மலேசியாவில் போலீஸ் சித்ரவதை - இந்தியர் மரணம்?

மலேசியா தலைநகர் கோலாலம்பூரில் இந்திய வம்சாவளியை சேர்ந்த என்.தாமிந்தரன்(32) வசித்து வந்தார். இவரை கடந்த 21–ந் தேதி போலீஸ் தலைமை அலுவலகத்திற்கு பிடித்து சென்றனர். அங்கு அவர் நெஞ்சுவலிப்பதாக கூறியதை அடுத்து மருத்துவமனைக்கு கொண்டு சென்றனர். ஆனால் வழியிலேயே அவர் பரிதாபமாக இறந்தார். பின்னர் அவருடைய உடல் பிரேத பரிசோதனை செய்யப்பட்டது. அப்போது அவருடைய உடலில் முன் மற்றும் பின் பகுதி, கால் ஆகிய இடங்களில் காயங்கள் இருந்ததாக அவருடைய மனைவி மேரி(26), எதிர்க்கட்சி பிரமுகர் சுரேந்திரன் ஆகியோர் புகார் கூறினர். போலீஸ் நிலையத்தில் சித்ரவதை செய்ததால் தான் அவர் இறந்ததாக குற்றம்சாட்டி, இது பற்றி விசாரணை நடத்தி சம்பந்தப்பட்டவர்கள் மீது நடவடிக்கை எடுக்க வேண்டுமென கோரிக்கை விடுத்துள்ளனர். ஆனால் பிரதமரின் கீழ் செயல்படும் போலீஸ் துறை இதை மறுத்துள்ளது.